Presentación Oficial do II Slalom Concello de Moeche

No día de onte, no Concello de Moeche, tivo lugar a presentación oficial do II Slalom Concello de Moeche, coa presenza da Alcaldesa, Beatriz Bascoy e a Concelleira de deportes, Iria Couce. Estiveron tamén presentes o presidente e a vicepresidenta de Escudería Moeche, Moisés Fernández e Marta Sánchez, que desvelaron as características desta nova edición da proba modestina. Durante a presentación oficial explicáronse as principais características da proba, puntuable para o campeonato galego de slalom, que se celebrará o próximo 8 de agosto nas rúas de San Ramón de Moeche. No referente as principais novidades, destaca o cambio de ubicación dos parques de traballo e pechado que desta volta se localizarán preto do circuito, para comodidade dos pilotos e membros dos equipos.

En canto ao trazado da proba, permanecerá invariable con respecto á pasada edición, debido á boa crítica acadada entre os pilotos que estiveron presentes, tanto a nivel técnico como de zonas para a colocación do público, con moitos lugares elevados dende os que desfrutar do espectáculo sen correr ningún risco.

A organización espera acadar uns niveis de participación similares á primeira edición deste Slalom Concello de Moeche, onde participaron 45 vehículos.